Psalms 104
Kaem Biya mel suen biya beteram ale ko sinar taso ko den
1Ani Kari Biya nup patawirikkowo!O Kaem, ni aninga Biya, ni gira nunguningkiri.
Ni King biya, nup biya sokel karogo.
2Ni nikinang biya te bagasam.
Ni taiti beterem se baras suen biya te anisan,
mu kawam sel kaloman ale bowa ningi bagara iwitata.
3Ni yu biya kualala beterem,
ale ka wonong o kuali biya kalem.
Se taiti nuwi mu nika karis iwita,
se daula ka giso kerak namoso taiso.
4Daula mu nika den karogo geraga ko kari ko nunga betesam se namasan.
Se pure biliwilik maso se ko nikinang mu ni ko ura kari ko nunga betesam.
5Ni ali imi sokel ago gek am nunguningkiri nungem,
se me namuruk tairukko.
6Ni gagi guang iwita te duruk ali lilim la ira murem se aniram,
gagi mu duruk suen la nunga ira muram.
7Se aking gagi tagi taukko den aora biya balem se
gagi naguram ale
8duruk kulupik la kaparam nama sor gomeng ningi kuwim to to namaram,
ko kuwim ni maingkala nunguru ago namerem mu to to namaram.
9Se aking udagi peleruk ali me ira murokko mu ko ni ko tom bita ago namerem.
10Ni duruk kulupik kulupik yu mutim bita bita ago namerem se,
yu te bulowolok aratoso, ale naguso nama bolala awuso ale yu biya ko aratoso.
11Se giarum ningi ko mel duap duap suen biya mu yu mutang nasan,
se donki diwang yu ko kuesan mu taisan agotala nasan.
12Se tam yu mu duap te mu inanganang taisan kuali singir mosan ale kower kower dagi namasan ale wur ilu se anisan.
13Ni balsam se duruk te tuwik kaposo,
se ali tuagu te mel suen biya nunguning kapa saposo.
14Ni balsam se sirsir hos bulmakau namonko mu aratoso,
sume galuk mel duap duap ana kariimet no se te ura betenakko mu aratoso.
15Se tam waen agunak ale te waen nungurnak ale nanak amilmilanakko mu se, tam oliv wel te nungurnak ale namake nangimik te sapanak se palengukko mu se, wit bret te nungurnak ale nanak nangimik guang sail tunakko mutang agotala aratu aratu namoso.
16Tam sida Lebanon sor te mu tuwik ninguru te kaposo, tam Kari Biya kota balam se aratam borta te kaposo.
17Se inanganang tam sida mutang kuali singir kalosan,
se malu mu tam saki kelemak mu te woresan ale anisan.
18Se belelek duruk kalel kalel mu awete anisan.
Se sawang mu duruk ko manga garap kulupik ningi yawarakala anisan.
19Ni sige suen biya te nunga ikinakko sige beterem.
Se worem mu tom nu te nama kapurukko mu ko ikiso.
20Ni turom beterem se, giarum ningi ko mel suen la turom ningi geragagilingisan.
21Se layen mu geraga se nunga inang Kaem balu nungaram mu kupu se niagilingisan.
22Se sor ukiso mu pelesan nunga nuguwim te nama taga anisan.
23Asele imikiri barasasan nunga ura sume ko namasan, ura iluwasan la nama baingaso, asele nonoman sapasan.
24O Biya, ni mel suen biya nunguningkiri nunga nungem!
Ni ka ikia biya, se yawarakala nunga nungem!
Se ali tuagu mel suen biya awete terong ma saparam.
25Ni gagi beterem, aromemek nunguningkiri se wosasel biya.
Se meltutuk naung ningi anisan, biya te gotek te, mu ana kaunakko me terong mam.
26Dal awete namasan taisan, se wal bibiya ni balem se arataman mu ningi kolosan tengesan.
27Kari Biya, nuna suen la mu nunga tom tom te ni na inang nungaruko kimi kisisan.
28Se ni na nungarsam se nasan,
ni la inang nungarsam se nasan ale nungumik ago terong maso.
29Tom ni biring gurugu nungarsam, mu nuna nguangasan.
Tom ni marak te bagomonko nungarsam mu tagi kutuwusam, mu nuna kuesan ale ali gege te nunga nungem mu ko geragasan.
30Bare ni ka Bur ura beteso se aking melmasak ali tuagu ago terong ma saposo.
31Aninga angamang Kari Biya ko nup biya, ko nikitang, ko sokel am tom suen biya anirukko!
Aninga angamang Kari Biya mel suen biya nungam mu ko ninguru amilmilarukko!
32Nu ali imi te loagoso mu wanara kaposo,
nu duruk kau taso mu tama bur kelagoso.
33Tom ani marak bagasam imi mu ani Kari Biya ko wur ilu se lagirikko,
ani tom suen biya aga Kaem ko wur ilu se ko nup patawirikko.
34Nu aninga amilmil suen la ko duap.
Se aninga angamang nu aninga wur iluwek mu ko amilmilarukko.
35Aninga angamang kari ikia memek betesan mu ali imi te mena namomonko.
Ani Kari Biya ko nup patawirikko! Aleluya!
Copyright information for
WSK